‘लुट’द्धारा सिंगल डे ग्रसको रेकर्ड

नेपाली ब्लकबस्टर ‘लुट’ले सर्वाधिक सिंगल डेको कलेक्सन रेकर्ड राखेको छ । शनिबार एउटै दिनमा ‘लुट’ले १४ लाख ग्रस आम्दानी गर्‍यो । यो अहिलेसम्मकै उच्च सिङ्गल डे कलेक्सन रेकर्ड हो । वितरक नरेन्द्र महर्जनले शनिबार स्क्रिनिङ गरिएका ३५ पर्दाबाट उक्त सेयर संकलन भएको बताए । पहिलो, दोस्रो र तेस्रो सप्ताहन्तभन्दा चौंथो सप्ताहन्तको शनिबार ‘लुट’ आक्रामक देखियो । यद्यपी, १ करोड ६७ लाखपछिको औपचारिक कूल ग्रस भने खुलाइएको छैन ।

 

 

‘लुटले शनिबारमात्रै १४ लाख कमायो’ महर्जनले भने, ‘नेपाली सिनेमामा यो पहिलोपटक हो ।’ ‘लुट’को यो सिंगल डे रेकर्ड कतिपय सिनेमाको कूल ग्रस हो । शनिबार ३५ पर्दामा उक्लिएको ‘लुट’ आइतबार पुनः २८ पर्दामा झरेको छ । शनिबार १५ सो उपलब्ध गराएको क्यूएफएक्सले आफ्नो संजालबाट ८ सो कटौती गरेको छ भने जयनेपाल थिएटरबाट अरु सिनेमा हटाएर ‘लुट’लाई मात्र सिंगल प्रदर्शनको मौका दिएको छ । महर्जनले मुलुकको सबै विवरण संकलन नभैसकेकाले कूल आम्दानी सार्वजनिक गर्नमा ढिलाइ भैरहेको बताए ।

चौंथो साताको सप्ताहन्तमा अग्रिम बुकिङ तीव्र भएपछि क्यूएफएक्सले १५ सो उपलब्ध गराएको थियो । यद्यपी, शुक्रबार रिलिज भएको सिनेमा ‘काठमाण्डू’भन्दा ‘लुट’को अकुपेन्सी बढी छ । १५ सो पाउने ‘लुट’ नेपाली रजतपटकै एकमात्र सिनेमा हो । ‘लुट’को यो अर्को रेकर्ड हो । सिनेमालाई आगामी साताबाट बिग सिनेमाज्मा पनि प्रदर्शन गर्ने तयारी भैरहेको महर्जनले जनाए । अष्ट्रेलियाको पाँच सोबाट ‘लुट’ले गतसाता साढे २२ लाख ग्रस कमाएको थियो ।